Eng läschte Kéier ora te vun Tonga!

Gëschter hu mer een Island Tour gemaach, mat eisem lokale Guide Vea, deen eis direkt opgekläert huet wat di 2 wichtegste Saachen hei zu Tonga sin:

1. Kee Mënsch huet eng Auer un, well Zäit ass onwichteg. (Dat hate mer scho gemierkt…). A wann een eng Auer unhuet, ass se meeschtens futti a just als Bijou oder fir unzeginn.
2. “Good food” ass alles! (Dat hate mer och scho gemierkt!) “You eat good tongan food, you become skinny like me!” huet hien ëmmer erëm betount a sech op säi ronne Bauch geschloen.

De Vea war wierklech witzeg. Hie wosst op all Fro eng Äntwert, heiansdo waren et zwar ganz eegesënneg Interpretatiounen, déi mir Owes beim Patt mam Paula an Tim vun eisem Guesthouse zimlech relativisiéiert kruten. Trotzdeem war et immens interessant wat hien sou iwwert d’Leit erzielt huet. Wat d’Sehenswürdegkeeten vun Tonga ugeet, huet ee wierklech an engem kuerzen Nomëtteg alles gesinn. Mee et ass unzeroden, mat engem Guide ze goen, well ee soss di puer Attraktiounen einfach net fënnt: Et gi keng Schëlter a fir ze wëssen bei wéi engem klengen Dirt-track ee muss ofbéien, muss een sech gutt auskennen.

Hufangalupe Land Bridge oder Coral Bridge

Obwuel Tonga sou platt ass wéi ee Sou, huet et beandrockend steil an héich Fielsküsten.

 

 

 

 

 

Fishing pigs

Un der Ost-Küst ass dat een heefegt Bild: Virun allem bei Ebbe wullen d’Schwäin am Miersand an iessen alles wat se erwëschen: Muschelen, Fësch, Algen, Kriibsen asw. Et heescht, dass dëst Schwéngefleesch och ee besonnesche Goût hätt…

Three-headed coconut-tree

Jo, hei bleiwen di puer Touriste stoen a mussen eng Foto maachen! Anscheindend déi eenzeg Kokospalm op der GANZER WELT mat 3 Käpp… sensationnell 😉

Ha’amonga Trilithon

Och Stonehenge aus dem Pazifik genannt. Di déck Steng goufen virun iwwer 3500 Joer vun enger anerer Insel op klenge Booter importéiert an aneneen gesat. Wéi, weess keen, well zu deem Zäitpunkt hun d’Menschen zu Tonga als häertsten Material Walschanken a Muschelen kannt. De Vea sot, den 21. Dezember, also op hirem längsten Dag, géif d’Sonn op een Zeeche schengen, wat dem VW Symbol gläicht a wat anscheindend uewen um horizontale Steen drop ass.

Tsunami Rock

Jo, wou kënnt deen décke Fiels do hier?? War et een Tsunami virun dausende vu Joren, deen de Fiels vun der Küst lass gerappt an op d’Festland geheit huet? Oder awer der Legend no ee Ris, deen Honger hat an dunn ee Steen vun der Nopesch-Insel Eua geholl huet fir ee Poulet ze fänken. Leider war en ausgerëtscht an de Steen ass heihinner gefall. De Vea huet awer och virsiichteg ze bedenken gin, dass een d’Aliens nimools ganz kann ausschléissen…

Flying Foxes

 

 

 

 

 

 

Soss Impressioune vun der Insel

 

 

 

 

 

 

 

 

 

 

  Ora te! 

Endlech si mer gutt zu Tonga ukomm, eiser 1. eegentlecher Etapp vun eisem Tour du Monde, wou mer 10 Deeg bleiwen.

Firwat dann hallef ronderëm d’Welt an ausgerechent DO ufänken??  (“Schlecht organiséiert!” géif mai léiwe Frënd Jaki aus der Steekaul soen!) Ganz einfach: Vu Juli bis Ufank Oktober gi sech hei all d’Bockelwalen Rendez-Vous fir “mate and breed” a si bleiwen mat hiren klenge Kaalwer hei, bis déi am Oktober grouss a staark genuch sin fir d’Reess weider no Süden an d’Antarktis unzetrieden. An hei zu Tonga ass eng vun deene ganz wéinege Plazen op der Welt, wou een dës riseg Déiren net nëmme ka gesinn, mee och nierwt hinne ka schnorchelen, wann ee Chance huet, an déi hate mer!! (Steet nach méi am Deel: Whale swimming)

Eis éischt Impressioune vun Tonga: Hei ass et anescht wéi doheem. Schon aus der Loft, virun der Landung huet ee gesinn, dass d’Insel zimlech flaach ass, mat Kokospalmen sou wäit wéi ee kucke kann! Mir sin op der Haaptinsel Tongatapu, mee et gehéiren nach vill aner Inselcher zum Kinnekräich Tonga, am ganzen huet d’Land awer just eppes iwwer 100 000 Awunner. Um Flughafen si mer vun enger Band, mat traditionneller tongaëscher Musik ëmpfaange gin, dat war schon zimlech flott! Mir si mam Taxi vum Flughafen bis op Ha’atafu am Nordwesten bei eist Guesthouse Holty’s Hideaway gefouert gin. Ënnerwee hu mer oft missten Muppen, Hinger an och groussen a klenge Schwäin tuten an auswäichen, déi hei iwwerall iwwert d’Strooss lafen.

Tonga ass relativ aarm: Di meeschte Leit hu keng Aarbecht a ganz Familjen, mat ville Kanner wunnen a klengen Hütten, méi kleng wéi eis Garage. Am Gaart viru bal all Haischen, leit immens vill Schrott a futtis Autoen an alles ass zimlech delabréiert. Mee d’Leit hun ëmmer ee léift Lächelen a soe ganz frëndlech moien, och d’Kanner kommen extra virun d’Dir gelaf fir ze wénken an Hello! ze ruffen, wann ee laanscht geet.

Mir wunnen hei zu Ha’atafu an engem klengen Haischen, just ca. 70 Meter vum Mier an enger herrlecher Plage ewech an et héiert een Dag an Nuecht d’Wellen donneren, déi sech méi wäit dobaussen um Riff briechen. An dat schéinst hei zu Tonga ass, dass d’Sophie an de Yann endlech konnten hire Lego auspaken!! Ganz Landschaften an all méiglech Haiser si schon opgeriicht!

BBQ um Sonndeg bei eis doheem, well Sonndes ass Tonga am Dornréische-Schlof: Alles ass zou, schaffen ass laut Gesetz verbueden, mat Ausnahm vun der Tourismus-Branche. Deen Dag fiert och keen öffentlech Transport an de Flughafen ass och zou. Sonndes fizen d’Leit sech eraus a gin an d’Kierch. An där gin et der hei an all klengem Duerf bal nach méi, wéi an der Gemeng Wahl! Et sin och di eenzeg Gebaier, déi richteg gutt ënnerhale sin. D’Männer an och oft d’Fraen sin hei nach ëmmer traditionnell gekleet, mat enger bloer oder schwaarzer Jupe, mat enger Zort geflechtenen Teppech ronderëm d’Hëften, heiansdo och mat engem richtegen Bast-Räckelchen.  Dat gesäit flott aus. Opfalend ass, dass praktesch di ganz Populatioun relativ opulent ass, nom Motto vun engem fréieren Kinnik: Big is beautiful. Mir hun och schon Madammen erwëscht di getuschelt a gelaacht hun, wa mir mat eise Fixspéins-Been laanscht getrëppelt sin.

Bei eis zu Ha’atafu ass d’Surfer-Paradies vu ganz Tonga, mee näischt fir Ufänger… D’Welle briechen sech a wonnerschéinen turquoisen Tuben méi wäit dobaussen um Riff. Op der Plage selwer si bal keng Wellen an et ass flott do ze spillen. D’Sophie an de Yann hun direkt eng ganz Korallestad um Sand gebaut. Wann een de Kapp an d’Waasser streckt gesäit ee scho beim Ufer onendlech vill Fësch vun allen Zorten a Faarwen, déi do ganz beschäftegt ronderëm schwammen an un de Koralle knabberen. Et ass een absolut Schnorchel-Paradies an et kënnt een sech net zou, wéi schéin et ass, kristallkloert Waasser, helle Sand a Korallen a Fëschelcher wou een hikuckt! Et mengt een et géif een an engem risegen Aquarium tauchen! D’Sophie an de Yann gin och begeeschtert mat schnorchelen, deen eenzegen Hoken ass, dass d’Waasser zimlech kal ass, an och mat Neopren hält een et keng stonnelaang aus, v.a. wann een sou wéineg Speck huet wéi d’Sophie an de Yann.

 Virun  e puer Deeg si mer op Nuku’alofa gefuer, fir e bëssen anzekafen, well dat ass hei zu Tonga net sou einfach. Wann ee frou as mat Breakfast-Crackers a Corned beef, huet een et gutt hei, do gin et an all klengem Buttick an all Duerf 100 verschidden Zorten, Formen a Faarwen. De Räscht vun de gängegen Liewensmëttel ass méi schwéier ze fannen ausser Uebst a Geméis, dat kann een einfach um Bord vun der Strooss kafen.

Lunch zu Nuku’alofa, am Friends’ Café. Et huet kee gestéiert dass een décken Hunn mat séngen Dickelcher do iwwert d’Terrass gelaf ass.

Nuku’alofa ass ganz kleng an huet wierklech kee besonnesche Charme…

Um Wee fir op Nuku’alofa si mer bei de Blow holes stoe bliwwen, eng vun den Haaptattraktiounen vun der Insel. Zimlech spektakulär! D’Welle briechen sech ënnert Fielsen, wou ronn Lächer dra sin an d’Waasser strutzt dann uewen zu de Lächer fontainenaarteg eraus.

Gëschter ware mer mat engem klenge Boot een Dagesausfluch op d’Insel ‘Atata maachen, wou mer ee relaxen Dag haten. Déi Insel ass bekannt fir hir Rise-Muschelen a mir si mam Boot nach ee Stéck méi wäit erausgefuer fir ze schnorchelen an hun der tatsächlech och vill gesinn! Di meescht waren op, d.h. doud, mee verschiddener waren nach lieweg, an déi hun ee phantastescht Muster zwëschen deenen 2 Muschel-Halschechten! Di gréisste Muschelen déi mer gesinn hun, waren ongeféier sou grouss wéi eng Buedbidden!!

 

Vu Wahl bei d’Walen…

Mir sin un 2 verschiddenen Deeg mat dem klenge Motorboot vu “Whale swimming” erausgefuer.

U Bord war de Skipper an den George, eise Guide, dee mat an d’Waasser gaangen ass. Di 1. Kéier hate mer nach eng australesch Madamm dobäi, déi scho ganz oft mat erausgefuer war (an 2 zimlech kitscheg Bockelwal-Tatooen hat) Si selwer hat och schon eng gewëssen Ähnlechkeet mat engem Wal, zum David sengem grousse Verdross, well praktesch op all Ënnerwaasser-Film oder -Photo di den David vun de Walen wollt huelen och d’Madamm en gros plan ze gesinn ass… Di 2. Kéier hate mer nierft dem Skipper an dem George eng eeler däitsch Koppel vu München dobäi, déi sech awer net getraut huet an d’Waasser ze goen, mee vill schéi Fotoe gemaach huet. De Mann hat zwar direkt ee gudden Androck gemaach, well hie war relativ onelegant flatsch an d’Boot eragefall wéi hie wollt eraklammen… Mee eigentlech ware si eng gutt Gesellschaft.

Mir haten 2mol Chance: D’Mier war roueg, d’Wieder ok an d’Bockelwalen waren tatsächlech um Rendez-vous!! Mir si kilometerewäit erausgetuckert an dun huet een an all Himmelsrichtung Wal-Aktivitéit gesinn: Iwwerall huet een hir Fontäne gesinn, wa se opgetaucht sin fir Loft ze huelen. Heiansdo huet een och ee Schwanz oder eng Bauch-Floss gesinn erausluussen. Mir waren dunn awer nach wäit ewech vun den Déiren an dofir hu mer probéiert sou no wéi méiglech bei eng Grupp (bis zu 7 Walen) oder eenzel Déiren erunzefueren. Réischt wa mer ganz no waren, hat et ee Wäert an d’Waasser ze goen. Mir si laang hin an hier gefuer, mee d’Walen haten anscheinend keng Loscht op Besuch an hu sech ëmmer erëm aus dem Stëps gemaach. Mee op eemol hat et awer geklappt: “Get ready!” huet den Skipper geruff. “Go, go, go!” Séier, séier Neopren, Flossen, Taucherbrëll a Schnorchel undoen, a schon sin d’Sophie an de Yann an d’Waasser gepucht gin, eise Guide den George, den David an ech hannendrun a séier mam Kapp ënner Waasser an da waren se do!! Mir waren immens beandrockt. Si si riseg grouss, awer net bedrohlech. Si beweegen sech schwerelos a scheinbar an Zeitlupe.

Um éischten Dag waren d’Bockelwalen nach relativ wäit ewech, mee d’Waasser war deen Dag ganz kloer an et huet een all Detail erkannt. 4mol si mer deen Dag mat verschiddene Wal-Gruppen an d’Waasser gaangen. Et waren all Kéier kleng Gruppe vu Männercher oder jonke Walen. Wat mir awer ënnerschat haten, ass d’Vitesse, mat där di gentle giants sech beweegen: Eemol kuerz mat der Bauch- oder Schwanzfloss gewibbelt a scho ware se am endlose Blo verschwonnen. Mir haten och e puermol Mammen mat hire Bébéën gesicht, mee d’Mammen sin natierlech virsiichteg a loossen net gären een ze no erun.  Mir hun awer héiren, wéi de Bébé-Wal mat senger Mamm geschwat huet a wéi seng Mamm geäntwert huet. Ganz flott!!

Di 2. Sortie, 3 Deeg méi spéit, war fir eis awer den absoluten Highlight! Mir haten ee jonke Männchen fonnt, dee geschlof huet. Hien ass gemittlech op der Plaz bliwwen an just vun Zäit zu Zäit eropgetaucht fir ze ootmen. Den George, den David an ech konnten sou no un hien eruschwammen, dass mer et bal net gleewe konnten!! (D’Sophie an de Yann waren um Boot bliwwen, well et hinne kal war no engem éischten Schwammen mat enger Grupp vun 3 Walen). Mir ware just nach ca. 4 Meter vum risegen Déier ewech. All Detail war ze gesinn, obwuel d’Waasser vill méi dréif war wi 3 Deeg virdrun. Mir hun all Fal a senger Schnuff, all “barnacle” (di Muschelen op hirem Kierper), all Muster op sengem Kierper a senge Flossen a seng An gesinn, déi zou waren, well hie jo geschlof huet. Hien ass e puermol just virun eis erop an erof getaucht an zu engem Moment huet hien sech säitlech gedréit an d’An opgemaacht fir ze kucken wien dann do géif iwwert him paddelen. Et war absolut phantastesch!! Mir waren iwwert 1/2 Stonn am Waasser mam Wal, bis deen ëss dunn awer genuch hat a sech mat enger eleganter Beweegung duerch d’Bascht gemaach huet. Wat eng eemoleg Erfahrung! Eis laang Reess op Tonga huet sech definitiv gelount!!

Mëttes sin d’Sophie, de Yann an ech op d’Insel Fafa gefouert gin, et war dem Sophie ee Moment net sou gutt am mir waren zimlech ënnerkillt. Mir hun eis do ee gemittlechen Nomëtteg op der paradisescher Plage gemaach an den David ass nach eemol mam Boot erausgefuer.

Hie konnt zwar net méi mat de Walen an d’Waasser goen, mee si hu vill Gruppe vu Wale gesinn, déi gespillt hun a mam ganze Kierper aus dem Waasser gespronge sin, an ee Panzschlag nom anere gemaach hun. Dat war och zimlech spektakulär.

(All d’Fotoen sin iwwregens ouni Zoom gemaach…)