Bora Bora. D’Pärel vum Pazifik.
Do hat ech mech scho laang drop gefreet a mir goufen net enttäuscht! Hei hate mir d’Luxus-Variant gewielt. Ech wollt wéinstens eemol a mengem Liewen a sou enger Hütt op Stelzen iwwert dem turquoise Mier schlofen. Am Pearl Beach Resort zu Bora Bora gouf deen Dram méi wéi erfëllt!
Dem David war dat alles scho bal too much, mee d’Kanner an ech hun di 2 Deeg immens genoss a mir wäre gären nach e bësse méi laang do bliwwen.
Schon d’Approche mam Fliger op Bora Bora gehéiert zu deene schéinsten Andréck vun der Reess:
Den zerklüften Vulkan an der Mëtt, d’Lagun an deene schéinste Faarwen a ronderëm di wäiss Koralleketten un där sech d’Wellen aus dem Pazifik briechen… Den Accueil um klenge Flughafen mat der Blummeketten war den Tëppelchen um i.
Eise Resort war esou schéin, et war scho bal surreal! An trotzdeem war et net pupeg. Och d’Personal war onkomplizéiert a léif, wéi bis elo all d’Leit hei op den Inselen. D’Clientèle huet natierlech haaptsächlech aus Honeymooners bestanen oder aus Koppelen an der Boma a Bopa hirem Alter.
Dem Sophie an dem Yann si bal Schwimmhäute gewuess, well si waren ouni Paus an der Schwämm.
Mir haten ee relaxe Programm mat Mini-Golf, Kayak, Schnorchelen an hirem Koralle-Gaart, di eemoleg Aussiicht genéissen a Cocktaile schlürfen. Ech hat di ganzen Zäit dat dämlecht Lidd “Do you like Piña Colada?” am Kapp…
Mir haten scho laang am Viraus vun doheem aus ee private Schnorchelausfluch gebucht. Eise Guide, den Tuaiva, huet eis Erklärunge gin an eis op di schéinste Plazen erausgeféiert. An an deenen knapp 4 Stonnen si mir ronderëm di ganz Insel gefuer a mir hun alles gesinn wat d’Mier bei Bora Bora ze bidden huet! Nierft Dausende vu wonnerschéine Korallen a Fësch hu mir Delfinen, Pointe-Noire-Haifësch (di de Yann ze kleng fonnt huet, an dobäi waren se sou grouss wéi ech…), Muränen, ee Grupp vun 23 Leopardrochen an ee Manta-Rochen entdeckt. Dat war neess een absoluten Highlight vun eiser Reess. Mir ware wierklech beandrockt!
D’Wieder war zwar net ëmmer paradisesch, mat heiansdo Stuerm a Reen, mee fir eis war dat net sou schlëmm. Hei ass d’Zäit definitiv ze schnell vergaangen, de Yann hat mol keng Zäit fir ze Verlaangeren. Dun hu mer schon neess missten d’Valiss paken fir op Rangiroa ze fléien…
Vu weegen Boring Boring, ech kommen op alle Fall nach eemol zréck!
